HSLC leh HSSLC topper-te Governor in chawimawi

by Editor

Tualchhung News

ZORAM TODAY| Aizawl 27th May, 2024 (Mon): Vawiin khan Governor Dr. Hari Babu Kambhampati chuan High School Leaving Certificate leh Higher Secondary School Leaving Certificate Examination 2024-a pakhatnate leh an nu leh pate chu Raj Bhavan a lengah a sawm a. He hunah hian Governor chuan HSLC-a pakhatna leh HSSLC arts, commerce leh science stream-a pakhatnate hnenah chawimawina thuziak leh lawmpuina sum fai a hlan a ni.

Governor Dr. Hari Babu Kambhampati chuan zirlai titha te hi a mal te tein a kawm a. Lehkha zir chhunzawm an tum dante zawtin, hna leh eizawnna chungchangte a sawipui a ni. Governor chuan zirlai tithazual te chu a lawmpui tih a sawi a, an thiamnate chu an hmalam huna hna tha tak leh eizawnna ngelnghet tak an neih theih nana hmang turin a fuih bawk a ni.

Mizoram Board of School Education (MBSE) in a tarlan angin Lalmoipuia Lawmzual s/o H.L Lawmzuala, St. Paul's Higher Secondary School, Aizawl chu High School Leaving Certificate Examination (HSLC) 2024-ah pakhatna a ni.

Higher Secondary School Leaving Certificate Examinations (HSSLC) 2024-ah hian Lalramdina Ralte s/o Lalthakima, St. Paul's Higher Secondary School chu Science stream-ah pakhatna a ni a, Commerce stream-ah David Lalhminghlua s/o Paul Zakhuma, St. Paul's Higher Secondary School, Aizawl chu pakhatna niin, Arts stream-a pakhatna chu Linden Lalremruatpuia s/o C. Lalrindika, Oikos Higher Secondary School a ni.